Leartibai Fundazioak ENPLEGU AZOKAren edizio berri bat antolatu du, Udal Gaztedi Lea-Artibai 2024 ekimenaren baitan. Aurtengo hitzordua ekainaren 14an izango da, Markina-Xemeinen kokatuta dagoen Lea-Artibai Berrikuntza Gunean (Xemein Etorbidea, 12A).

Goizeko 10:00etan hasi eta eguerdiko 13:00ak arte, eskualdeko 17 enpresa eta erakunde izango dira bertan, bakoitza bere stand-ean, gazteei laneratzeko dituzten aukerak aurkeztu eta lan-poltsa ezberdinetan sartzeko aukera eskaintzen.

Ekimen honen helburu nagusia da eskualdeko gazteen eta enpresen arteko harreman zuzena sustatzea, haien enplegagarritasunean eraginez. Horrela, hainbat lan-eskaintza izango dituzte eskura, eta beraien kurrikulumak stand ezberdinetan uzteko aukera izango dute.

Burdinola S.Coop. (Amoroto), Cikautxo S.Coop. (Berriatua), Eika S.Coop. (Etxebarria), Fagor Arrasate S.Coop. (Etxebarria), Itsaskorda S.L. (Markina-Xemein), Kautenik S.L. (Berriatua), Kide S.Coop. (Berriatua), Laboral Kutxa, Lantegi Batuak, Leartiker S.Coop. (Markina-Xemein), Lea Artibai Ikastetxea (Markina-Xemein), Maier S.Coop. (Gernika-Lumo), Nemak (Etxebarria) eta Orbea S.Coop. (Mallabia) enpresek parte hartuko dute Enplegu Azokan. Horrez gain, Lanbide (Ondarroa), Novia Salcedo Fundazioa (Bilbo) eta Lea Artibai Mankomunitateak ere beraien stand-ak jarriko dituzte.

Lea-Artibai eskualdeko merkataritza, turismo eta ostalaritzan lana bilatu nahi dutenek ere, beraien kurrikulumak Leartibai Fundazioaren stand-ean uzteko aukera izango dute.