Rekalde Aretoak Maider Aldasoro artistaren bakarkako erakusketa aurkeztu du, Barriek 2026 programaren barruan. Programa hori Bizkaiko Foru Aldundiak bultzatzen du eta erakundeak ematen dituen arte plastiko eta ikusizkoen beken onuradun diren zenbait artista biltzen ditu. Erakusketa 2026ko azaroaren 22ra arte egongo da zabalik.

Maider Aldasororen praktika artistikoa jantzien sorkuntzaren, pertsonaien garapenaren, bideoaren eta eskulturaren arteko elkargunean kokatzen da. Lengoaia horien konbinazioaren bidez atmosferak eraikitzen ditu, non gorputza eta ametsen, antzerkiaren eta jolasaren eremukoak direnak elkarri lotzen zaizkion sexualitatearekin, jolasarekin eta botere-harremanekin lotutako gaiak jorratzeko.

Gerezi Hori izenburupean, erakusketak keinu bat hartzen du abiapuntutzat, espezifikoa bezain iruditeriaz betea: gerezi-zurtoin bati mihiarekin korapilo bat egitea. Errealitatearen eta asmatutakoaren arteko oroitzapenetik abiatuta, artistak eskultura eta ehun-elementuak erabiltzen ditu, desiraren, memoriaren, fantasiaren eta identitate-eraikuntzaren arteko lotura anbiguoak eta iradokitzaileak gogora ekartzen dituztenak.

Erakusketarekin batera doan testuan, azaltzen du erakusketak gogoeta egiten duela oroitzapenen zalantzazko izaerari buruz eta zenbait irudik gure memorian geratzeko duten moduari buruz.  Gerezi-zurtoin bati mihiarekin korapilo bat egiteko keinuarekin loturiko nerabezaroko pasarte imajinatu batetik abiatuta, artistak unibertso bat eraikitzen du, ehunezko formez, iradokitako gorputzez, antzerki-figurez eta etxekoa, fantastikoa eta seduktorea denaren eremuen artean dantzatzen diren objektuz betea.

«Erakusketa hau keinu horretatik abiatzen da. Oso zehatza den keinu bat, pertsona zehatzek, neska nerabeek, egin dezaten asmatua. Hasieratik egin nahi izan nuen eskultura-erakusketa bat, eta ezinbestekoa izan da gorputza sartzea: harrapatzen nauena eta imajinarazten didana, nerabe bat banintz bezala», adierazi du artistak.

Maider Aldasoro

Euskal Herriko Unibertsitateko Arte Ederretako graduduna da Maider Aldasoro, eta bere prestakuntzaren zati bat Norwich University of the Arts unibertsitatean osatu zuen, baita Madrilgo Unibertsitate Konplutentsean Arte eta Sorkuntzako Ikerketako Masterra egin ere. Azken urteotan, ibilbide artistiko nabarmena egin du, eta egonaldi artistikoak egin ditu, besteak beste, Paradise Air-en (Tokio), Ertibil Bizkaia 2023 programaren barruan —non bigarren saria lortu baitzuen—, baita Azkuna Zentroan eta BilbaoArte Fundazioan ere.

Bere bakarkako erakusketa berrienen artean, nabarmentzekoak dira Hiru iltze hatz baten (ANTI Liburudenda, 2025), Axila, que robo sobaco (BilbaoArte Fundazioa, 2023), Flexy my Tether (Art Lacuna, Londres, 2022), B.A.C.E. proiektuaren barruan, eta Aurrean Goxo (Azkuna Zentroa, Bilbo, 2021).

Jarduerak

Rekalde Aretoak guztientzako hezkuntza-jardueren programa publiko zabala eskaintzen du. Jarduera horien helburua da gaur egungo praktika artistikoaren inguruan hausnartzeko eta erakusketa-proposamenak gozatzeko guneak sortzea.

Tailerrak antolatuko dira talde itunduentzat, irakasleentzat, ikasleentzat, familientzat eta adinekoentzat, bai eta topaketak ere Maider Aldasoro artistarekin, sormen-prozesuetan sakontzeko.

Jarduera guztiak doakoak dira, eta, batzuetarako, beharrezkoa aldez aurretik izena ematea, edukiera osatu arte.