Beka horiek edozein pertsona fisiko edo juridikok, 18 urtetik gorakoak eta edozein nazionalitatekoak eska ditzake, arlo eszenikoetako sormen edo ikerketa-proiektuak bultzatu edo egin nahi baditu, batez ere, eszena berriekin lotuago daudenak, antzerkia, dantza eta/edo mugimendua izanik ardatz nagusi, alde batera utzi gabe arte eszenikoen diziplina tradizionalagoekin lotuago dauden proiektuak, hala nola, kaleko antzerkiarekin, zirkuarekin eta abarrekin. Proiektu horiek oinarri hauetan ezarritako garapenari eta zenbatekoei buruzko baldintzetara egokitzeko modukoak izan behar dute.

Helburu nagusia da arlo eszenikoetan sorkuntza edo ikerketa prozesuak garatu nahi dituzten artistei eta erakunde artistikoei laguntzea, dirua eta azpiegiturak emanda.

Bi laguntza mota daude:

1. Hasierako fasean dauden proiektuentzako laguntzak: laguntza bakoitza 2.000 eurokoa izango da. Hasiera batean 4.000 euro bideratuko dira laguntza hauetarako.
2. Garapen fasean dauden proiektuentzako laguntzak: laguntza bakoitza 4.000 eurokoa izango da. Hasiera batean 8.000 euro bideratuko dira laguntza hauetarako.

Bekaren %75 egoitza artistikoaren hasieran ordainduko da, dagokion kontratua sinatu ondoren, eta gainerako %25a egoitzaren memoria aurkeztu ondoren. Bekaren diru-kopuruaren barruan daude egoitza egonaldiaren ondoriozko bidaia, ostatu, dieta, eta abarren gastuak, artista bakoitzari dagozkionak.