Bizkaiko Foru Aldundiak abian jarri du Bizkaia Repara kanpainaren hirugarren edizioa. Kanpaina horren bitartez, kontsumo-ondasunen konponketa eta berrerabilpena sustatzen ditu, hondakinen sorrera murriztu, eta kontsumo arduratsuagoa bultzatzeko. Edizio berri honetan, foru-erakundeak kanpainaren aurrekontua 60.000 eurora arte handitu, eta herritarren eskura 6.000 deskontu-bonu jarri ditu, eta, berritasun nagusi gisa, bonuak atxikitako establezimendu fisikoetan bigarren eskuko artikulu jakin batzuk erosteko ere erabiltzeko aukera ezarri du; hartara, handitu egiten dira kontsumo jasangarrirako aukerak.

Kanpaina bi fasetan garatuko da: irailaren 15etik urriaren 6ra zabalik egongo da Bizkaiko establezimenduak ekimenari atxikitzeko epea. Aurrerago, azaroaren 5etik 2027ko otsailaren 7ra, herritarrek kanpainan parte hartzen duten dendetan trukatu ahal izango dituzte bonuak.

Aurreko edizioetan bezala, Bizkaian bizi diren  pertsonek 10 euroko bonuak lortu ahal izango dituzte erosketetan edo konponketetan gastatutako 20 euroko (pertsona bakoitzak, gehienez ere, bost bonu metatu ahal izango ditu), eta kanpainari atxikitako establezimendu batean edo gehiagotan erabili ahal izango dituzte.

Kontsumo-ondasunen konponketan espezializatutako establezimenduek parte hartu ahal izango dute kanpainan, eta, horiez gain, lehen aldiz, erabilitako artikuluen (altzariak, jantziak eta etxean erabiltzeko bestelako tresnak) txikizkako salmentan diharduten dendek ere bai.

Diruz lagun daitezkeen konponketen artean sartuko dira, besteak beste, kategoria hauetakoak: ehuna eta osagarriak, oinetakoak, etxetresna elektrikoak, ordenagailuak eta ekipo informatikoak, komunikazio-ekipoak, altzariak, erlojuak eta bitxiak. Konponketa horiei, orain, kanpainari atxikitako establezimenduetan erosten diren erabilitako ondasunak ere gehituko zaizkie.

Finkatutako kanpaina

Bizkaiko Foru Aldundiak 2024aren amaieran jarri zuen abian Bizkaia Repara, Hondakinen Prebentzioaren Europako Astearen barruan, produktuen balio-bizitza luzatu, hondakinen sorrera murriztu, eta tokiko merkataritza espezializatuari laguntzeko.

Harrezkero, kanpaina kontsumo-ohitura jasangarriagoak bultzatzeko tresna gisa finkatu da. Lehenengo bi edizioetan ia 4.000 pertsonak parte hartu dute, 4.000 konponketa inguru egin dira, 9.865 bonu trukatu dira eta 31 tona hondakin sortzea saihestu da.

Zehazki, bigarren edizioan, aurtengoan, 2.089 parte-hartzaile egon dira, 5.215 bonu trukatu dira (horietatik 370 aurreko deialdiko soberakinari dagozkionak) eta 2.102 konponketa egin dira; hartara, 17 tona hondakin sortzea saihestu da.

Informazio gehiago nahi izanez gero: Bizkaia Repara - Bizkaia.eus