• EAEko udalerriren batean erroldatuta egotea, 2024ko Auzolandegiak programa arautzen duen Ebazpena EHAAn argitaratu aurretik.
• Erkidegoz kanpoko pertsonek, halaber, bizileku-baimena eduki behar dute.
• 14 eta 30 urte bitarteko adina izatea. Auzolandegi bakoitzak bere adin-tartea du ezarrita. Euskadiko auzolandegiak 14 - 26 urte bitarteko gazteentzat dira. Aniztasun funtzionala duten gazteentzat: 14-30 da adin-tartea.
• Auzolandegia hastean adierazitako adina izan behar da, eta adin-tartearen barruan egon behar da auzolandegiak irauten duen bitartean. Auzolandegiaren hasieran 14 urte dituzten 13 urteko pertsonek eman dezakete izena.
• Nazioarteko auzolandegien kasuan (munduko edozein gaztek parte har dezake halakoetan): ingelesez ondo hitz egitea. Batzuetan, auzolandegiko hizkuntza beste bat izan daiteke, adibidez, frantsesa edo alemana. Atzerrian ere nazioarteko Auzolandegiak daude, baina baita Euskadin eta gainerako autonomia-erkidegoetan ere.
• Umeekin egotea beharrezko duten ekintzak dituzten auzolandegietan lan egiteko, Sexu Delitugileen Erregistro Zentralak emandako agiria aurkeztu beharko da.
• Pertsona jakin batzuek ezin dute izenik eman, azken hiru deialdietako batean adjudikazioa lortu arren auzolandegian parte hartu ez dutenak, alegia; baina salbuespen gisa hartuko dira, Eusko Jaurlaritzako Gazteria Zuzendaritzan plazari uko egiten ziotela jakinarazi zutenak.

Auzolandegietan jatorri ezberdinetako gazteak biltzen dira, euren borondatez eta ordainetan ezer jaso gabe, aldi batez elkarrekin bizi eta gizarte osoarentzat onuragarria den proiektu batean parte hartzeko.

• Iraupena: normalean, hamabost egunekoak izaten dira.
• Lanaldia: gutxi gorabehera, astean 20 ordutan lan egiten da, gehienbat goizez. Arratsaldez jarduera soziokulturalak egiten dira inguruneko errealitatearen berri izateko, bai eta aisialdiari eta astialdiari lotutako jarduerak ere, esate baterako, ondare historiko-artistiko aberatsa duten tokietara joatea. Atzerrian, zenbaitetan, ordu gehiago egiten dituzte; batzuetan, baita arratsaldez ere.
• Osaera: 15 eta 20 boluntario artean, eta, horrez gain, arduradun teknikoa eta zuzendaritzako taldea.
• Zuzendaritzako taldea: auzolandegiko zuzendariak eta gutxienez gazteen elkarte bateko kide diren bi sustatzailek osatuko dute.