Martxoaren 16ra arte dago zabalik Provider Programako enpresa ideien lehiaketara proiektuak aurkezteko epea.

Lehiaketan parte hartzeko aukera izango dute Bizkaiko Lanbide Heziketako Zentroetako kide diren edota Urratsbat programaren laguntza izan duten pertsonek. Izen hori duen programaren bidez, Tknikak enpresak sortzen laguntzen du.

Ondoen baloratutako bi ekimenek 6 hilabeteko egonaldia irabaziko dute BIC Bizkaia Ezkerraldeko Ekintzailetza Gelan eta 1.000 euroko saria proiektua garatzeko; horrezaz gainera, enpresa-haztegi horren talde teknikoaren aholkularitza izango dute.

Lehiaketak amaiera ematen die BIC Bizkaian 5 hilabetez egin diren sentsibilizazio-jardunaldiei, 3DLan, Drone by drone, K-Robots, Ludus eta ZeniaLabs enpresen bidez 4.0 industriarekin lotutako teknologiak ezagutarazteko: Big data, blockchain, Iot, zibersegurtasuna, droneak, elkarlaneko robotika, 3D inprimaketa, errealitate birtuala/areagotua.

Martxoaren 17an ezagutuko dira hamar proiektu finalistak. Martxoaren 20tik maiatzaren 5era taldeek tutoreen laguntzarekin prestatuko dituzte epaimahaiari aurkezteko proiektuen azken defentsak (maiatzaren 18an).

Ekainaren 9an sariak banatuko dira.